ထောက်ကြန့်မြို့ ရပ်ကွက် တစ်ခုရဲ့ လမ်းသွယ်လေး တစ်ခု အတွင်းရှိ မြေစိုက် အုတ်ခံ တစ်ထပ် အိမ်လေးရှေ့ ထိုင်ခုံလေးပေါ်မှာ ကုန်ပစ္စည်းကြော် ငြာ ပါတဲ့ တီရှပ် နဲ့ အနီရောင်ေ ဘာင်းဘီတို ဝတ်ဆင်ထားတဲ့ အသက် ၅၀ ကျော် အရွယ် လူတစ်ဦး ထိုင်နေပါတယ်။ သူ့ဘေးမှာတော့ အနက်ရောင် ဖုန်းအသေးစား လေး တစ်လုံးနဲ့ အတူ ချိုင်းထောက်တစ်ခုက ရှိတယ်။
သူ့ပုံစံက အသားက ခပ်ဖြူဖြူ၊ ခန္ဓာကိုယ်က ပြည့်ဖြိုးဖြိုး နဲ့ အရင်က တုတ်ခိုင် သန်မာတဲ့ သူ့လက်နှစ်ဖက်မှာ စာတန်းပါ တဲ့ ဆေးမင်ကြောင်တွေဟာ ဟိုနေရာ၊ သည်နေရာ နဲ့ နေရာ အနှံ့အပြား ယူထားပါတယ်။ အရင်က သန်မာဟန် ရှိတဲ့ သူ့လက်၊ ပေါင်တံ နဲ့ ခြေသလုံးတွေမှာ အသားတွေ လျော့ရဲပြီး တွဲကျနေပါတယ်။
နေရောင်ကြောင့် မျက်နှာပြင်က အသားအရေဟာ နီစပ်စပ်ဖြစ်နေပြီး နှုတ်ခမ်းမွေးတွေ က ထိုးထိုးထောင်ထောင် နဲ့ ဟိုတစ်စ သည်တစ်စ ။ ရင့်ကျက်ဟန်ရှိ နေတဲ့ မျက်နှာဟာ အနည်းငယ် ခက်ထန် နေသလိုလိုနဲ့ အနီရောင်ဘက် သန်းနေတဲ့ သူ့ မျက်စိ အရောင်ကြောင့် ရုတ်တရက် သူ့ ကို မြင်လိုက်ရတဲ့သူတစ်ချို့က သူ့ကို ခေါ် နေကျ နာမည် က ‘ဟယ်လူယုတ်မာကြီး”တဲ့ ။
သူ့နာမည်က “ ဦးမင်းစိန် ” လွန်ခဲ့တဲ့ နှစ်ပေါင်း ၂၀ ကျော် အချိန်တုန်းက ရုပ်ရှင်၊ ဗီဒီယို နဲ့ တီဗီ ဖန်သားပြင်တွေပေါ်မှာ နေရာ ရခဲ့သူ။ လူဆိုး၊ လူမိုက်၊ ဓားပြ၊ လူသတ်ကောင်၊ မူးယစ် ဂိုဏ်းစတား၊ အ မျိုးသမီးတွေကို အဓမ္မကျင့်သူ နေရာတွေမှာ ပီပီပြင်ပြင် သရုပ်ဆောင်ခဲ့သူ။
သူရိုက်ခဲ့တဲ့ ရုပ်ရှင် နဲ့ ဗီဒီယိုဇာတ်ကားပေါင်း ၁၀ဝ၀ ဝန်းကျင်ရှိတယ် လို့ သူက ဆိုပါတယ်။ လက်ရှိ အချိန်မှာတော့ ဦးမင်းစိန် အပါအဝင် လူကြမ်း ၁၀ဝ ခန့် ဟာ ဇာတ်ကားတွေ မရိုက်ရတော့ဘဲ မိသားစု ဝမ်းရေး အတွက် ကြုံရာ ကျပန်း အလုပ်ကို လုပ်ကိုင်နေရတာပါ။
အရင်ကလို ဇာတ်ကားတွေ အများအပြား မရိုက်ရတော့ပေမဲ့ သူ့လို ဘဝတူတွေထက် စာရင် သူက ရိုက်ကူးမှုတွေရှိနေသေးတဲ့ အတွက် ကံကောင်းတယ် ပြော ရမယ်လို့ ဆိုပါတယ်။ လက်ရှိ အချိန်မှာ ဦးမင်းစိန်ဟာ အရင်က ဖိုက်တင် ကားတွေ၊ အသတ်အပုတ် ကားတွေနဲ့ ကြမ်းကြမ်း ရမ်းရမ်း သရုပ် ဆောင်ရင်း ရရှိခဲ့တဲ့ ဒဏ်ရာတွေကြောင့် ထောက်ကြန့်မှာ သုံးဘီး ဆိုင်ကယ်မောင်းသမား ဘဝနဲ့ မိသားစု ဝမ်းရေးကို ဖြေ ရှင်း ပေးနေရပေမဲ့ တစ်ခါတစ်ရံ လူကြမ်းနေ ရာက သရုပ်ဆောင်ဖို့ ကမ်းလှမ်းလာရင် ရိုက်ကူးနေရသေး တယ် လို့ ပြောပြပါ တယ်။
“ခြေထောက်ကလဲ သိပ်မကောင်း တော့လို့ အရင်လို ကြမ်းတမ်းတဲ့နေရာက မဟုတ်ဘဲ ငြိမ်ငြိမ်လေးထိုင်ပြီး ညွှန်ကြား ရတဲ့ လူဆိုး ဆရာကြီးနေရာက သရုပ် ဆောင်ရတာတော့ ရှိသေးတယ်၊ ဒါလဲ သုံးလလောက်မှ တစ်ခါပါ”
သူ့ရဲ့ လက်ရှိ ဝင်ငွေဟာ တစ်နေ့ကို ကျပ် ၂၀ဝ၀ ကနေ ၁၀,ဝ၀ဝ ကျော် အထိ ရှိနေတယ်ဆိုပေမဲ့ သုံးဘီး ဆိုင်ကယ် မဆွဲရတဲ့နေ့တွေလည်း ရှိနေတတ်ပါတယ်။ ‘ရေခဲသေတ္တာလေး သယ်ချင်လို့ လာ ငှားတယ်ဆိုရင် ၂၀ဝ၀၊ ၃၀ဝ၀ လောက် ရတယ်၊ ဈေးဦးမပေါက်တဲ့နေ့တွေလဲ ရှိသေးတယ်၊ ဆိုင်ကယ် စမောင်းတုန်းက လူတွေက ဦးမင်းစိန်ကြီး ရုပ်ရှင် ရိုက်နေ တာလားဆိုပြီး မေးကြတာ၊ လောလောဆယ် ဒီလိုပဲ ဖြေရှင်းနေရတယ်˘ လို့ သူက တစ်လုံးချင်းပြောပြပါတယ်။
သူ့ဘဝအကြောင်း ပြောပြနေရင်း သူ့ အသံဟာ တစ်ခါတစ်ခါ တုန်နေတတ်ပြီး မျက်ဝန်းမှာ မျက်ရည်တွေ ဝေ့နေတတ်ပါတယ်။ ဒဏ်ရာ ဗရပွ လက်ရှိ အချိန်မှာတော့ ရုပ်ရှင် ရိုက်ကူးရင်း ရခဲ့တဲ့ ဒဏ်ရာတွေ အဖြစ် ဘယ်ဘက် ဒူးဆစ်ပြုတ်ထွက်တဲ့ ဒဏ်ရာ၊ မြင်း ပေါ်က ပြုတ်ကျလို့ ရခဲ့တဲ့ ခါးနောက် ကျော ရိုး ဒဏ် ရာ၊ မင်းသားနေရာ လူစားထိုးပြီး ကျွမ်း ထိုးတဲ့ အခန်းကြောင့် ရရှိတဲ့ ဒဏ်ရာတွေနဲ့ ပြည့်နေပါတယ်။
အရင်က လူကြမ်းနေရာ သရုပ် ဆောင်ဖို့ ရှုတင် ရှိရာနေရာ သုံးလေးခုကို အပြေး အလွှား သွားရောက်ပြီး ရိုက် ကူးခဲ့ ရပေမဲ့ လက်ရှိ အချိန်မှာတော့ တစ်လနေလို့ တစ်ခါတောင် မရိုက်ရတော့ဘူးလို့ သူက ရှင်းပြပါ တယ်။ ဟိုအရင်အချိန်က သူ့ရဲ့ ပီပြင်တဲ့ သရုပ်ဆောင်ကောင်းမှုကြောင့် ပရိသတ်တွေက သူ့ကိုမြင်တိုင်း လန့်ပြီးပြေးသူ၊ ဇာတ်ကား ထဲက အတိုင်းပဲ အပြင်မှာ မြင်နေကြတုန်းပဲလို့ သူက အဓိပ္ပါယ်ပါတဲ့ အပြုံးနဲ့  ပြုံးနေ ပါတယ်။
လွန်ခဲ့တဲ့ ၁၀ နှစ်ကျော်က ပြင်ဦးလွင်မှာ ရုပ်ရှင် ရိုက်ရင်း မြို့ထဲကို ဦးမင်းစိန် နဲ့ ဟာသ သရုပ်ဆောင် ကင်းကောင် တို့ နှစ်ဦးလျှောက်လည်နေကြရင်း တစ်နေရာ အရောက်မှာ အမျိုးသမီး ပရိသတ်နှစ်ဦးသူတို့ ရှိရာနေရာကို ပြေးလာပါတယ်။ ဟာသ သရုပ်ဆောင် ကင်းကောင်ကို ပြုံးရွှင်ရယ်မောနှုတ်ဆက်ပြီး ဘေးမှာရှိနေတဲ့ သူ့ကို မြင်တော့ အလန့်တစ်ကြားနဲ့ “ဟယ် လူယုတ်မာကြီး မသေသေးဘူး လား” ဆိုတဲ့ ပြောဆိုမှုဒဏ်တွေ မကြာခဏ ခံခဲ့ရဖူးတယ်လို့ ပြန်ပြောပြပါတယ်။
‘အားရပါးရကို ပြောတာ၊ သေချင်းဆိုးကြီး၊ လူယုတ်မာကြီး၊ ကိုယ်ကတော့ ပြုံးပြီးကြည့်နေရတယ်၊ ငါက ရုပ်ရှင်ထဲက လူယုတ်မာပါ၊ အပြင်မှာ မဟုတ်ပါဘူး၊ အဲဒီလိုပြောတော့ သူတို့က ကျွန်မ တို့ ယောင်သွားလို့ပါ၊ အပြင်မှာ ဦးမင်းစိန် ကို ဇာတ်ကားတွေထဲက ဟာကိုပဲ ပြေးမြင်မိကြတာလို့ သူတို့က ပြန်ပြောတယ်လေ” လို့ သူက အတိတ်ကို ပြန်သတိရဟန် နဲ့ ပြောပြပါတယ်။
မင်းသမီးတွေနဲ့ အလိုမတူဘဲ အတင်းအဓမ္မ ကျင့်တဲ့ ဇာတ်ရုပ်ကို သရုပ်ဆောင်ရင်း အားမစိုက်ပေမဲ့ ဒါရိုက်တာက သရုပ်ဆောင် ပီပြင်အောင် လုပ်ခိုင်းတာကြောင့် မဖြစ်မနေလုပ်ရတဲ့ အခါမှာ အရှိန် လွန်တာတွေကြောင့် ပြဿ နာတွေနဲ့ ကြုံတွေ့ ခဲ့ဖူးပါတယ်။ ‘ဒါဒါ နဲ့ ဆို အအော်တောင် ခံရတယ်၊ ” ဦးမင်းစိန် ရှင် ဘယ်လို ဖြစ်နေတာလဲ၊ ဒီမှာ နှုတ်ခမ်းမွေးတွေ စူးကုန်ပြီ ” ဆိုပြီး မင်းသမီးက စိတ်ဆိုးပြီး ရိုက်ကူးရေး မရိုက်ဘဲ အိမ်ပြန်မယ် ဆိုတာကြောင့် မနည်းတောင်းပန်ခဲ့ရတယ်၊
”သမီးရယ်၊ ငါက ငါ့အလုပ် ငါ ပီပြင်အောင်လုပ်ရတာ” ဆိုပြီး မနည်းတောင်းပန်ရတယ်” လို့ သူ့ အတွေ့ အကြုံ ကို ပြောပြပါတယ်။ မင်းသမီးတွေကို အတင်းအဓမ္မ ဆွဲခေါ်ပြီး ပြန်ပေး ဆွဲရတဲ့ ဇာတ်ကားတွေ ရိုက်တဲ့အခါမှာလည်း သူ့အတွက် အခက်အခဲနဲ့ တွေ့ကြုံခဲ့ရဖူးသလို သူ့ကြောင့် မှားတာ မဟုတ်ဘဲ မင်းသမီးရဲ့ အမှားကြောင့် ဇာတ်ဝင်ခန်း တစ်ခန်းကို ခြောက်ခါလောက် ပြန်ရိုက်ခဲ့ရဖူးပါတယ်။
အဲသည် ဇာတ်ကားကတော့ မြို့ကနေ ရွာ ပြန်လာတဲ့ သူကြီး သမီးဖြစ်တဲ့ မင်းသမီး လှအဉ္စလီတင့် ကို သူ့ရဲ့ တပည့် ဖြစ်သူတွေနဲ့ အတူ လှည်းပေါ်ကနေ အတင်း ဆွဲချတဲ့ အခန်းရိုက်ရတာပါ၊ ဇာတ်လမ်း အရ နေ ပူပူ၊ ဖုန် ထူထူမှာ ရိုက်ရတာပါ၊ မင်းသမီးက မကျေနပ်လို့ သူ့ကို ပါးရိုက်တဲ့ အခန်း ရိုက်ကူးနေချိန် ကြုံတွေ့ ရတာပါ။
“အဲဒီလိုပဲ ပါးရိုက်လိုက် ပြီးတော့ သူက ဟီးဟီး မှားသွားပြီ ဆိုပြီး အဲဒီတော့ ဒါရိုက်တာက သမီး နေလဲပူတယ်ကွာ၊ ဟိုမှာလဲ ပါးကြီးလဲ ရဲနေပြီ၊ သမီး သေချာလုပ်ပါ ဆိုပြီး အဲဒါလဲ သည်းခံရတာပဲ”လို့ ပြောရင်း သတိ ရဟန် နဲ့ သူ့ပါးကို စမ်း လိုက်ပါတယ်။
ပရိသတ်တွေရဲ့ တုံ့ပြန်မှုသဘောက လူကြမ်း သရုပ်ဆောင်တွေကို အပြင်မှာ တွေ့ရင် ဇာတ်ကားထဲ က အတိုင်း ပဲ မြင်နေတတ် တာတွေကြောင့် သူ အလုပ် လုပ် ခါစ တုန်းကဆိုရင် မကြာခဏ ဝမ်းနည်းမိတတ် တယ်။ ကြောက်ကြတယ် လူကြမ်း သရုပ်ဆောင်ကောင်းလို့ အောင်မြင်သွားရင် အပြင်မှာရော ရုပ်ရှင် ဇာတ်ကားကြည့်နေတုန်းမှာပါ ဆဲဆိုတာတွေ ခံရပြီး လူရွှင်တော်တွေနဲ့ မင်းသားတွေ ကျတော့ ပရိသတ်တွေက ပြုံး ရွှင်ပြီး နှုတ်ဆက်တတ်ကြတယ်လို့ သူက ဆိုပါ တယ်။
‘တစ်ခါ တစ်ခါ ရင်ထဲကို ထိတယ်၊ ဘတ်စ်ကား စီးလို့ နေရာလွတ်တယ် ဆိုပြီး ဝင်ထိုင်မိတာ ဘေးမှာ ရှိနေတဲ့ ကောင်မလေးက ကြောက်ပြီး ကားပေါ်က ပြေး ဆင်းတာ ခံရဖူးတယ်” လို့ ပြောပါတယ်။ ရုပ်ရှင်လောက ကို သူစပြီး ဝင်လာချိန်က မင်းသားတွေကို ဖိုက်တင်နေရာက နေ သရုပ်ဆောင်ဖို့ပြသရတဲ့ ကွန်ဖူး ဆရာတစ်ယောက် ဖြစ်ပါတယ်။
မင်းသားတွေကို အသတ်အပုတ် အတွက် လေ့ကျင့်သင်ကြားပေးရင်း တပည့် ဖြစ်သူက အောင်မြင်တဲ့ မင်းသားနေရာ ရောက်လာတော့ သူပါ ဇာတ်ကားတွေထဲမှာ ကိုယ်တိုင် သရုပ်ဆောင်ရင်း လူကြမ်း မင်းသားနေရာကို ရောက်မှန်းမသိ ရောက်လာတာပါ လို့ သူက ပြောပါတယ်။
“ခုတော့ သူတို့တွေသာ ပျောက်သွားတာ၊ ကိုယ်က ဆက်တိုးပေါ့” သူ စတင် သရုပ်ဆောင်တဲ့ ဇာတ်ကားက မင်းသားစိုးသူ ပထမဆုံး ရိုက်ခဲ့တဲ့ “ မိုက်ကြွေး မိုက်ပြစ် ” ဆိုတဲ့ ဇာတ်ကား နဲ့ စတင် သရုပ်ဆောင် ခဲ့ပြီး ဖိုက် တင် ဇာတ်ကားတွေနဲ့ နာမည် ရခဲ့တဲ့ မင်းသား ရဲကိုကို နဲ့ ရဲမင်းပိုင် ကို သင်တန်းနည်းပြ အဖြစ် သင်ပေး ရင်းက သူတို့ ရိုက်တဲ့ ဇာတ်ကားတိုင်းမှာ မလွတ်တမ်း ရိုက်ကူးခဲ့ရသူ ပါ။
သူ (ရဲကိုကို) က ရုပ်ရှင်ရိုက်ချင် တယ်ဆိုတော့ ကျွန်တော့် ဆရာဆီမှာ လာပြောတယ်၊ ကျွန်တော် က ဖိုက် တင်နဲ့ ဖြစ်အောင် သင်ပေးမယ်၊ မင်း မဖြစ်ရင် ငါ့ လည်ပင်းကို လာဖြတ် ဆိုပြီး လောင်းကြေးထပ်ခဲ့တာ” လို့ သူက ပြုံးပြီးပြန်ပြော ပါတယ်။ သူနဲ့ အတူ တွဲပြီး ရိုက်ဖူးခဲ့တဲ့ မင်းသားတွေက စိုးသူ၊ ရန်အောင်၊ ကျော်ရဲအောင်၊ ရဲအောင်၊ လွင်မိုး၊ ရဲကိုကို၊ ရဲမင်းပိုင်၊ ဒွေး၊ သီဟတင်စိုး၊ မင်းအုပ်စိုး၊ လူမင်း၊ မင်းမော်ကွန်းနဲ့ မြင့်မြတ်တို့ ဖြစ်တယ်လို့ ဆိုပါတယ်။
သူ အသတ်အပုတ်၊ ဖိုက်တင် ပညာတွေ သင်ပေးခဲ့တဲ့ တပည့်တွေနဲ့ ဆုံတဲ့ ဇာတ်ကားတွေမှာ နှစ်ဖက် တိုက် ခိုက်တဲ့ အခန်းတွေမှာ ခံရတဲ့နေရာက အမြဲပဲ သရုပ်ဆောင်ခဲ့ရတယ်။ ရဲကိုကို နဲ့ ရိုက်တဲ့ ဇာတ်ကားမှာဆို မင်းသားရဲ့ လက်သီးချက်ကြောင့် သတိမေ့ဖူးတဲ့ အထိ ဖြစ်ခဲ့ရပါတယ်။
‘ရဲလေး မင်း အဲဒီလို ထိုးရင် ငါ့ပါး ကို ထိနိုင်တယ် ဆိုပြီး သတိပေးတာ မရဘူး၊ ထင်ထားတဲ့အတိုင်း ထိုးတာ၊ နောက်မှာလဲ အုတ်နံရံပဲ ရှိတော့ တာ၊ ရှေ့မှာ လက်သီး နဲ့ တစ်ပတ်လည် သွားချိန်၊ ဂုတ် ဆိုတဲ့ အသံနဲ့ အတူ နှာခေါင်းကို ထိသွားတာ၊ သွေးတွေ အတောင့်လိုက် ပန်းထွက်ပြီး မေ့သွားတာ” လို့ ပြောရင်း နှာခေါင်းက ဒဏ်ရာကို လက်နဲ့ ပွတ်သပ်လိုက်ပါ တယ်။
လူကြမ်း သရုပ်ဆောင်တွေဟာ မင်းသားတွေ နဲ့ သတ်ပုတ် ရတဲ့ ဖိုက်တင်ဇာတ် ကားတွေမှာ မင်းသားတွေရဲ့ လက်သီးချက်တွေ၊ ခြေနဲ့ ကန်မိတာ၊ တုတ် နဲ့ ရိုက်မိတာတွေ မကြာခဏ ခံခဲ့ရပေမဲ့ လူကြမ်းတွေက သရုပ်ဆောင်ရင်း မင်းသား ကို ထိမိ ခိုက်မိပါရင် ရှုတင်မန်နေဂျာကို သည်လူ ကြမ်း နဲ့ မရိုက်ဘူး လို့ ပြောတော့ လူကြမ်းတွေ မရိုက်ရတာတွေလည်း ရှိတယ်လို့ သူက ရှင်းပြပါတယ်။
‘မင်းသားကို ထိမိတာ သိပ်မရှိပါဘူး၊ မင်းသားက ဘရိတ်ပေါက်ရင်တော့ ဆော ရီးတဲ့ ၊ ကိုယ်တွေ ထိမိရင် နောက်မခေါ်နဲ့ လို့ ပြောရင် ကိုယ်ပဲ ထမင်းငတ်မှာ” လို့ ပြောတယ်။ ရဲကိုကို အပြင် ရဲမင်းပိုင် နဲ့ ရိုက်တဲ့ ဇာတ် ကားမှာလည်း သူ အပြင်းအထန် ဒဏ်ရာ ရရှိခဲ့ဖူးပါတယ်။ မျက်နှာချင်းဆိုင် မြင်းစီးပြီး ပြေးလာတဲ့ အခန်းမှာ မြင်းပေါ်ကနေ မတ်တတ်ရပ်ပြီး မင်းသားက ခြေ ထောက် နဲ့ ရင်ဘတ်ကို ကန်ရတဲ့ အခန်းမှာ အရှိန် လွန်ပြီး မြင်းပေါ်က ပြုတ်ကျသွားပါတယ်။
သူ သတိရလို့ ကြည့်လိုက်တဲ့ အချိန် မှာ ရိုက်ကူးရေးနေရာ မဟုတ်ဘဲ အိမ် တစ်အိမ်မှာ ရောက်နေတာပါ။ သူ ဒဏ်ရာ အကြီးအကျယ် ရခဲ့တဲ့ ဇာတ်ကား ကတော့ မင်းသား ရန်အောင် နဲ့ ရိုက်ကူးရတဲ့ “ကျောက်လက်ဝါး နဲ့ စိုင်းဗေဒါ ” ဇာတ်ကားပါ။ သည်ဇာတ်ကားဟာ အက်ရှင်ကားဖြစ်ပြီး အသတ် အပုတ်တွေ၊ ဒိုင်ဗင်ထိုးတဲ့ အခန်းတွေလည်း ပါပါတယ်။
လှည့်မကြည့်ကြ
အဲသည် အချိန်တုန်းက သူ မင်းသား ထွန်းထွန်းနိုင် ရဲ့နေရာမှာ လူစားထိုးပြီး ဒိုင်ဗင် ဝင်ထိုးရပါတယ်။ ဒိုင် ဗင် ထိုးရင်း မတော်တစ်ဆ ထိခိုက်မှုကြောင့် ခြေသလုံးရိုး ပြုတ်ထွက်ပြီး သုံးလလောက် အိမ်မှာ နားခဲ့ရပါတယ်။ လမ်းမလျှောက်နိုင်လို့ ဖင်ကို တစ်ရွတ်တိုက် ဆွဲပြီး သွားခဲ့ရတာကြောင့် သူ့ရဲ့မိသားစု ဒုက္ခရောက်မှာကို သူ ပူပန် ခဲ့ပေမဲ့ ထုတ်လုပ်သူရော ဒါရိုက်တာ ဘက်ကပါ ထောက်ပံ့ကြေးပေးတာတွေ မရှိခဲ့ဘူး လို့ ပြောပါတယ်။
“မျက်ရည်တွေ တင်ကျတာ မဟုတ်၊ စိတ်ဓာတ်တွေပါ ကျသွားတာ၊ ပြည်မှာ ရှိ တဲ့ အစ်မ က သူ့အိမ်မှာ ဗမာဆရာ နဲ့ ခေါ် ကုပေးလို့ သက်သာ လာတာ၊ မင်းသား မင်းသမီးတွေက ဒဏ်ရာ ရလို့ မရိုက်နိုင်ရင် ပရိသတ်တွေက သနားတယ်၊ သူတို့ မှာ စီးပွားရေးလဲ ရှိတော့ မပူရဘူး၊လူ ကြမ်းတွေ ကတော့ အလုပ် မလုပ်နိုင် ရင် ဒုက္ခရောက်ရတာ” လို့ ပြောပြပါတယ်။
လက်ရှိ အချိန်မှာတော့ ဦးမင်းစိန် တို့လို လူကြမ်းတွေမှာ ဇာတ်ကား ရိုက်ကူးမှုတွေ အများအပြား မရှိတော့ဘဲ အနည်း ငယ်သာ ရှိတာကြောင့် လူကြမ်း အများစုဟာ ကြုံရာ အလုပ်လုပ် နေရသူတွေ အများ ကြီးရှိနေပါတယ်။ မြို့ စွန်က နေရာတွေမှာ မုန့်ဆိုင်လေး ဖွင့်ပြီး ရောင်းသူ၊ ဆိုင်ကယ် ကယ်ရီ ဆွဲနေသူ၊ ကားမောင်းတဲ့ အလုပ် လုပ်ကိုင်နေသူတွေ၊ မိသားစုကို ပြန်ပြီး မှီခိုနေရတာတွေလည်း ရှိနေတယ်လို့ သိရပါတယ်။ အကြမ်း၊ အရမ်း၊ အသတ်အပုတ် ကားတွေနည်းသွား သလို ဒရာမာ ဇာတ်ကားတွေမှာ လူကြမ်းနေရာ၊ လူဆိုးနေရာ၊ ဂိုဏ်းစတားနေရာတွေမှာ သရုပ်ဆောင်နေသူ လူကြမ်းတွေ နေရာပျောက်နေရပြီ လို့ သူက သုံးသပ်ပါတယ်။
ဦးမင်းစိန် တစ်ယောက်ကတော့ လွန်ခဲ့တဲ့ ဆယ်စုနှစ်တွေတုန်းက ဇာတ်ကား တစ်ကား အတွက် ရိုက်ကူး ရတဲ့ငွေတွေက သားသမီးတွေကို ပညာသင်ပေးနိုင်တယ်၊ မိသားစု စားဝတ်နေရေးကို အပြည့်အဝ တာဝန်ယူနိုင်ခဲ့တာကြောင့် သည်အလုပ်ပေါ် မှာ စိတ်ရော ကိုယ်ရောနှစ်ပြီး လုပ်ခဲ့တယ်။ ခုချိန်အထိ သည် လောကက အပြီးတိုင် ထွက်သွားဖို့ တစ်ခါမှ မစဉ်းစားခဲ့ပါဘူး။
သားသမီး ငါးယောက် ဖခင်ဖြစ်တဲ့ သူဟာ ရုပ်ရှင် စတင်ရိုက်ကူးစ အချိန်တုန်းက သူ ပါဝင် သရုပ်ဆောင် ရိုက် ကူးခဲ့တဲ့ ဗီဒီယို ဇာတ်ကား ထွက်လာရင် နေအိမ်ကို ယူသွားပြီး မိသားစု နဲ့ အတူ ကြည့်ခဲ့ဖူးပါတယ်။ အတူကြည့်နေချိန်မှာ မင်းသားရဲ့ ရိုက်နှက်မှုကြောင့် သူ သွေးထွက်သံယို ဖြစ်နေတဲ့ အခန်းတွေပါတဲ့အချိန်၊ ရဲတွေက ဖမ်းပြီး ထောင်ကျတဲ့ အခန်းတွေရောက်ရင် ဇနီးနဲ့ သားသမီးတွေဟာ မျက်ရည်တွေ ကျပြီး ဆက်မကြည့်ဘဲ အပြင်ကို ထွက်သွားတာကြောင့် နောက်ပိုင်းမှာ သူ အိမ်ကို ယူမသွားတော့ပါဘူး။
သူ သရုပ်ဆောင်ခဲ့တဲ့ ဇာတ်ကားကို ရပ်ကွက်ထဲက ရုံတွေမှာ သွားရောက် ကြည့်ဖို့ သူ စီစဉ် ခဲ့ပေမဲ့ ရုံထဲမှာ သူပါဝင် သရုပ်ဆောင်တဲ့ ဇာတ်ဝင်ခန်းတွေရောက်ရင် ပရိသတ်တွေက “ဒီကောင် မသေသေ ဘူးလား၊ လူယုတ်မာကောင်ကို အရှင်မထားနဲ့ သတ်သတ်” ဆိုတဲ့ ပရိသတ်တွေရဲ့ အသံတွေကို သူကြားခဲ့တာကြောင့် ရုံထဲ မဝင်ဘဲ ပြန်လှည့်ခဲ့ပါတော့တယ်။
‘ကိုယ့်ဇာတ်ကားလေးပြနေတယ် ဆို ပြီး ဝင်ကြည့် မလို့ ဂိတ်ပေါက် ကနေ ချောင်းကြည့်တာ၊ ပရိသတ်တွေ ကိုယ့်ကို ဆဲနေတာနဲ့ ကြုံလို့ အပေါက်ဝ ကနေ လှည့်ပြန်ခဲ့ရတယ်၊ စဉ်းစားကြည့် အဲဒီအချိန် မှာသာ ပရိ သတ်တွေက ဦးလေးကို တွေ့ ရင် ဘယ်လို တုံ့ပြန်မလဲ၊ စဉ်းစားသာ ကြည့်တော့” လို့ ပြောပြရင်း ရယ်နေပါတယ်။
ဆရာဝန် ဖြစ်ဖူးတယ် လူကြမ်းနေရာကပဲ အမြဲ သရုပ် ဆောင်နေတဲ့ သူ့အတွက် ရိုက်နေကျဖြစ်တဲ့ ဇာတ်နဲ့ ဆန့်ကျင်ဘက်နေရာကနေ သရုပ်ဆောင်ဖို့ အခွင့်အရေး တစ်ချို့ ရခဲ့ဖူးပါတယ်။ အဲသည် ဇာတ်ရုပ် ကတော့ မြို့ကနေ တောရွာ တစ်ရွာမှာ တာဝန်ထမ်း ဆောင်ဖို့ ဆရာဝန် တစ်ယောက်အဖြစ် သရုပ်ဆောင်ရမယ့် ဇာတ် ရုပ်ပါ။
မူလ စီစဉ်ထားတဲ့ သူက အဆင်မပြေ ဖြစ်တာကြောင့် သူ့ကို ဆရာဝန်နေရာကနေ သရုပ်ဆောင်ဖို့ ကမ်း လှမ်း ခံခဲ့ရတာပါ။ ရိုက်ကူးတဲ့ ရွာမှာ ရွာသားတွေက ဆရာဝန်ကိုကြိုဖို့ စုပြီးစောင့်နေတဲ့ အချိန်မှာ သူတို့ ထင်ထားသလို ဆရာဝန်က လူကြမ်း သရုပ်ဆောင်ဖြစ်တဲ့ သူ့ကိုတွေ့တော့ သတိလက်လွတ်နဲ့ သည် လူ ယုတ်မာက ဆရာဝန်နေရာက သရုပ်ဆောင်တာ ဆိုပြီး အဟား ခံခဲ့ရဖူးတယ်လို့ ပြန် ပြောပြပါတယ်။
ခုနောက်ပိုင်းတော့ ရန်ကုန်နေသူတွေက သူ့ကိုတွေ့ရင် အရင်ကလို ခပ်ကြမ်းကြမ်း စကားလုံးတွေ နဲ့ ဆက်ဆံမှုတွေ မရှိတော့ဘဲ နယ်က လူတွေကတော့ အခုချိန်အထိ သူ့ကို ရုပ်ရှင်ထဲက အတိုင်းပဲ ပြန်မြင်နေကြတုန်းပဲလို့ သူက ပြောပါ တယ်။ ပရိသတ်တွေက ဇာတ်ကား ရိုက်ကူးမှုတွေ ပြီးတဲ့ အချိန်တွေ ဆိုရင် သူတို့ လို လူ ကြမ်းတွေကို ထမင်းကျွေးတာ၊ လက်ဆောင်ပေးတာ ၊ နှုတ်ဆက်တာတွေ ရှိနေတုန်းပဲ လို့ သူက ပြော ပါတယ်။
‘ခုတော့ ခံရတာ များလို့ အရေတောင် ထူနေပါပြီ၊ မိန်းမကြီးတွေဆို ပိုဆိုးတယ်၊ ဟာ အကြံဆိုး နဲ့ လူကြီး ဆိုပြီး ပြော ကောင်းတုန်း” လို့ ပြန်ပြောပြရင်း ဘေး ထိုင်ခုံပေါ်က မျက်နှာပြင် တစ်ခုလုံး ကြေမွ အက်ကွဲနေတဲ့ ဟွာဝေး အမျိုးအစား ဖုန်း လေးကို ကောက်ကိုင်လိုက်ပါတယ်။
လက်ရှိအချိန်မှာတော့ သူဟာ သူ ပိုင်ဆိုင်တဲ့ သုံးဘီး ဆိုင်ကယ်လေးကို မောင်းရင်း သူ့ကို လူကြမ်း သရုပ်ဆောင်နေရာက သရုပ်ဆောင်ဖို့ ကမ်းလှမ်းလာမယ့် သူကို မျှော်နေပါတယ်။
သူက ‘ပိုင်ဆိုင်မှု ဆိုလို့ ကလေး ငါးယောက်သာ အဖတ်တင်တယ်၊ ငွေက စုထားတာ တစ်ပြားမှ မရှိဘူး ၊ အိမ်လခ ကလဲ ပြည့်တော့မယ်” လို့ ပြောရင်း သက်ပြင်းချလိုက်ပါတယ်။ Author အေးအေးအောင်
Credit: Kumudra
No comments:
Post a Comment