တေးရေး .. ကိုမောင်မောင် ရဲ့  ကြိုးကြာသံ

{၁၉၇၆ မှိုင်းရာပြည့်မှာ စစ်အစိုးရက လိုက်လံဖမ်းဆီးလို့ ၀ရမ်းပြေးအဖြစ် တိမ်းရှောင်ပြေးခဲ့ရတဲ့ metallurgy (သတ္တုဗေဒ) အင်ဂျင်နီယာ ကျောင်းသား မောင်မောင် (ကွယ်လွန်သူ ဂီတ ပညာရှင် ကိုမောင်မောင် (ခ) အဉ္စလီမောင်မောင်) ကို၊ ၃၂ နှစ်မြောက် မှိုင်းရာပြည့် အရေးအခင်းမှာ အမှတ်တရ ရှိနေတာနဲ့ ၁၉၉၈ မတ်လ မာယာ မှာ ဖော်ပြခဲ့တဲ့ ဆောင်ပါးကို ပြန်လည် ဖော်ပြ ခြင်း ဖြစ်ပါတယ်။}

......ငှက်တို့သည် 'ဟူလို' အမည်ရှိသော ယင်းတို့၏ ခေါင်းဆောင်ကြီးအား "အသင်ခေါင်း ဆောင်ကြီး ငါတို့အား ဘုန်းတန်ခိုးကြီးတော်မူသော အရှင်သခင် ငှက်ဘုရင် 'စီမောင်တော်' ထံသို့ ခေါ်ဆောင် ပေးလော့" ဟု တောင်းပန်တိုးလျှိးကြကုန်၏။ 

ငှက်ခေါင်းဆောင် 'ဟူလို' ကလည်း ငှက်အပေါင်းအား ယင်းတို့ ချီတက်ဖြတ်သန်းရမည့် ခရီး ကန္တာရ ၏ ဒုက္ခဆင်းရဲ အထွေထွေ၊ ကြောက် မက်ဖွယ် အပြားပြားတို့ကို ရှည်လျားစွာ ရှင်းလင်း ဖော်ပြ၏။ ပျံသန်းကျော်လွန်ရမည့် ခုနှစ်ဆင့်၊ ခုနှစ်တန်သော ချိုင့်ဝှမ်းကြီးများ အကြောင်းကို 'ဟူလို' သည် ဥပမာ အမြောက်အများ၊ ဆင်ခြင် သုံးသပ်ဖွယ် အပြားပြားနှင့် ရောပေါင်းယှက်ထွေ ဆာဆာဝေေ၀ ပြောပြလေသည်။

ငှက်တို့ ပျံသန်းကျော်လွန်ရမည့် ချိုင့်ဝှမ်း အစဉ်သည်ကား-

ပထမ- ရှာဖွေခြင်း ချိုင့်ဝှမ်း
ဒုတိယ- ချစ်ခြင်း ချိုင့်ဝှမ်း
တတိယ- နားလည်ခြင်း ချိုင့်ဝှမ်း
စတုတ္ထ- လွတ်လပ်ခြင်းနှင့် အတွယ်လွတ်ခြင်း ချိုင့်ဝှမ်း
ပဉ္စမ-သန့်စင်စွာ တစ်ပေါင်း တစ်စည်းတည်း ဖြစ်ခြင်း ချိုင့်ဝှမ်း
ဆဌမ- အံ့သြခြင်း ချိုင့်ဝှမ်း
သတ္တမ- ပစ္စည်းဥစ္စာဆင်းရဲခြင်းနှင့် ဗလာ ဟင်းဖြစ်ခြင်း ချိုင့်ဝှမ်းတို့ ပေတည်း။
[၁၃ ရာစု စာဆို Fard Aladin Attar ၏ The Conference of the Birds ပျို့ ကြီးမှ]


ဘသန်း (ဓမ္မိက) မြန်မာပြန်သော ယောနသံ စင်ရော် (သတ္တမ အကြိမ်ထုတ်) စာအုပ်နောက်ပိုင်း တွင် ဒဿ       န  ပုံဆောင်ဝတ္ထု ၃ ပုဒ် ပါရှိခဲ့ရာ အထက်ပါ ဖရာစီ စာဆို ဖရ်ဒ် အာလာဒင် အတ္တား ၏ (ငှက်ညီလာခံ) သည် တစ်ပုဒ် အပါအ၀င် ဖြစ်၏။ 


ဒဿ        န ပုံဆောင် ၀တ္ထုသဖွယ်ဖြစ်သော ထိုပျို့ကြီး၌ အထောင်အသောင်းသော ငှက်တို့သည် သမုဒ္ဒရာများ၊ တောင်တန်းများ၊ ကန္တာရများကို ပျံသန်းကျော် ဖြတ်ခဲ့ကြရာ နောက်ဆုံး ငှက် သုံးကျိပ် သာလျင် ခရီးပန်းတိုင် အဆုံးသို့ ရောက်ခဲ့ကြသည်ဟု ဆိုပါသည်။


ကိုမောင်မောင်နှင့် ခင်မောင်တိုး ၏ ' ကြိုးကြာသံ ' ကို နားထောင်တိုင်း ကျွန်တော်သည် ဖရ်ဒ် အာလာဒင်အတ္တား ၏ ငှက် ညီလာခံပျို့ကြီးမှ ထို ဇာတ်ကွက်ကို အောက်မေ့ဆင်ခြင် နေမိပါ သည်။

                                        xxxx xxxx xxxx xxxx xxxx

'ကြိုးကြာသံ' ဟူသော သီချင်းခေါင်းစီး အမည်ကို တွေ့လိုက်သောအခါ 'ကြိုးကြာ ကရ၀ိတ်၊ တောလုံး တိတ်မျှ၊ ညိတ်ညိတ်တွန်ထူး' ဆိုသည့်၊ ရှေးခေတ်စာဆို တစ်ဦး၏ အဖွဲ့အရ၊ ကြိုးကြာ ငှက် ၏ သာယာသော အသံနှင့် အတူ ကြိုးကြာဖိုမ တို့၏ ရာသက်ပန် သစ္စာတိုင် အချစ်ကို ကြားရတော့မည်ဟု ထင်ခဲ့မိ၏။ မဟုတ်ပါ။




ကိုမောင်မောင် နှင့် ခင်မောင်တိုး တို့သည် ကြိုးကြာ၏ အလှကို အသံတွင် မရှာ၊ အသံတွင် မယူဘဲ 'ပျံသန်းမှု' ဖြင့် ရေးဖွဲ့ သီဆိုလိုက်ကြပါသည်။


'မိုးဦး ၀င်ရောက်လာတဲ့အခါ ရိုးမပေါ် ဖြတ်ပျံရင်း......'
ခင်မောင်တိုး သည် သူ၏ ချိုသော ပင်ကိုယ်သံကို အကွန့်အမြူး၊ အလူးအလွန့် မလုပ်ဘဲ (အသံ ပရိယာယ် တန်ဆာ မဆင်ဘဲ) ရိုးရိုး အေးအေးလေးဖြင့် စဖွင့်လိုက်၏။ ကျွန်တော့် အာရုံထဲတွင် ညို့သော ကောင်းကင်ပြင်ကြီး တစ်ခုလုံး ကြိုးကြာငှက် တို့၏ တောင်ပံများဖြင့် ဖွေးဖွေးဖြူ သွား သည်။


' ဖြတ်ပျံရင်း.......' စာသားနောက်မှာ တယောသံ (ဟု ကျွန်တော်ကြားသည်) တစ်ချက် လွန့်လူး ကပ်ပါလာသည်။ ကြိုးကြာ တို့၏ အတောင်ပံ ခတ်သံလား...၊ လေစီးကြောင်း၏ ဆန့်ကျင် အော်မြည်သံ လား....။

' မြောက်ဖက်ကို ဦးတည်လှည့်ကာ
သားဖောက်ရာ အရပ်ဆီ
မိုင်ထောင်ချီ ပြန်(ပျံ)လေပြီ.........'

သီချင်း စာအုပ်များ၌ (ပြန်လေပြီ) ဟူ၍ (ပြန်) စာလုံးကို သုံးပြထားပါသည်။ သီချင်းနားထောင် ရသူ အဖို့မှာမူ ပြန် (Return) ရော၊ ပျံ (Fly) နှစ်မျိုးစလုံး ခံစားရ၏။


မြောက်ဖက်......ဘယ်အထိနည်း.....။ သားဖောက်ရာ အရပ်ဆီ....... မိုင်ပေါင်းထောင်ချီ ပျံသန်း ကြလေကုန်သည်တဲ့။ တယောသံလေးက ' ပြန်လေပြီ' စာသားနောက်မှာ ကပ်ပါလာပြန်သည်။


'ကြိုးကြာငှက်တို့ရဲ့ မိုင်ထောင်ချီ ခရီးစဉ်'
ပထမပိုဒ် ဤတွင် ပြီးထားပါသည်။ တေးသွား၊ စာသား၊ ခင်မောင်တိုး ၏ ဆိုဟန် တို့နှင့်အတူ ကျွန်တော် မိုင်ထောင်ချီခရီးစဉ်ထဲသို့ လိုက်ပါ ပျံသန်း သွားခဲ့သည်။ (ကျွန်တော် ကြိုးကြာငှက် တစ်ကောင် ဖြစ်သွားသည်။)


ဒုတိယအပိုဒ်တွင်-
' မျိုးဆက်ရဲ့ အားမာန်တစ်ခုပါ လမ်းကြောင်းမှန် ရွေးချယ်ခြင်း..........'

အတူလိုက်ပါ ပျံသန်းရင်းမှ (ကြိုးကြာငှက် တစ်ကောင်ဖြစ်နေရင်းမှ) ကျွန်တော်သည် သီချင်း နားထောင်သူ အဖြစ်ကိုပါ ရရှိနေပြန်၏။ ပထမအပိုဒ်နှင့် သံစဉ်တူ ဤ 'မျိုးဆက်ရဲ့  အားမာန် တစ်ခုပါ' ဒုတိယပိုဒ်သည် ပျံသန်းခြင်း ခရီးစဉ်နှင့် အတူ ပျံသန်းခြင်းသေနင်္ဂဗျူဟာနှင့် ပျံသန်းခြင်း သဘောတရား တစ်ခုကို ဖော်ထုတ်လာသည်။


' လမ်းကြောင်းမှန် ရွေးချယ်ခြင်း'
လေစီးကြောင်း၊ တူရူပျံသန်းရမည့်ဒေသ၊ မနားမနေ လှုပ်ရှားနေရသည့် တောင်ပံများ၊ ဟိုး အောက်ဖက်တွင် တောင်တန်းများ၊ သစ်တောများ၊ ပင်လယ်သမုဒ္ဒရာများ၊ မြက်ခင်းပြင်များ၊ လွင်တီး ခေါင် ကန္တာရများ။

' ........အများနည်းတူ သက်လုံမကောင်းရင်
မွေးဖွားရာအရပ်ဆီ၊ မိုင်ထောင်ချီ ပျံနေရင်း........'

တယောသံလေး ၀င်လာပြန်ပြီ။

'....ကြိုးကြာငှက်တစ်ချို့လေ ချီလာစဉ် ကျန်ရစ်ပြီ......'

အထောင်အသောင်း အုပ်စုကြီးထဲမှ အချို့ ကြိုးကြာတို့၏ တောင်ပံများသည် စွင့်စွင့်ကားကား ထက်အောက်လှုပ်ရှား နေရာမှ ယွင်းပြိုသွားကြသည်။ ပျံသန်းမှုပုံစံ ပျက်သွားသည်။ 

ထို့နောက်.....
သူတို့ သမုဒ္ဒရာထဲသို့၊ တောင်တန်း တောအုပ်များထဲသို့ ထိုးစိုက် ကျဆင်းသွားကြ၏။ တစ်ကောင်......၊ နောက် တစ်ကောင်.....၊ နောက်တစ်ကောင်.... အများနည်းတူ သက်လုံ မကောင်းကြ ရှာသူ တွေ၊ ကျန်ရစ်ပြီ။ သက်လုံကောင်းသော ကြိုးကြာတွေကတော့ ဆက်၍ ပျံဆဲ ပျံမြဲ။

                                    xxxx xxxx xxxx xxxx xxxx

သံစဉ်တူသော ပထမပိုဒ် နှင့် ဒုတိယပိုဒ်တို့ကို နားထောင်နေရင်း၊ ရင်ထဲမှာ ကြေကွဲလာသည်။ ပထမပိုဒ်ကို နားထောင်စဉ်က ရရှိသော ခံစားမှုသည် သံစဉ်တူ ဒုတိယပိုဒ် အဆုံးတွင် ပြောင်းလဲ သွား၏။ ကျန်ရစ်ခဲ့သော ကြိုးကြာ တို့ကို ပျံသန်းဆဲ ပျံမြဲ ကြိုးကြာတို့ ကယ်တင်မနေအားနိုင်ကြ။

 မိမိတို့၏ တောင်ပံများကို တစ်ချက်ကလေးမှ မနား၊ လှုပ်ရှားပေးနေကြရသည်။
'သက်လုံ မကောင်းသူတို့' ကျန်ရစ်ခဲ့ ကြပေတော့ကွယ်။ ဆက်ပျံသော ကြိုးကြာတို့၏ အတောင် ပံ အောက်က နှလုံးသားထဲတွင် ကျန်ရစ်သူတို့ အတွက် ကြေကွဲစွာ နှုတ်ဆက်ခြင်းဖြင့်ပင် မလျော့နိုင် သော အားမာန်ကို အစားဖြည့်လိုက်ကြရ၏။


ကိုမောင်မောင် နှင့် ခင်မောင်တိုး တို့သည် ကြိုးကြာငှက် တို့၏ ပျံသန်းမှု ခရီးစဉ်ကို ဤမျှဖြင့် ရပ်နားပြီးဆုံး မထားအပ်ကြောင်း ကောင်းစွာသိကြသော အနုပညာရှင်များ ဖြစ်ကြပါသည်။
ကျန်ရစ်ခဲ့သော ကြိုးကြာငှက်တို့အတွက် ကြေကွဲရသည့် ကျွန်တော့်ကို chorus ပိုဒ်ဖြင့် ပုတ်နှိုး သတိပေးပါသည်။


'ဆုံးဖြတ်ချက် တစ်ခုကျမယ့်
အရှုံးနဲ့ အောင်မြင်ခြင်းဟာ
ရှိသင့်တဲ့ အားနဲ့မာန်.... ဟန်နိုင်မှ'


ဒရမ်ချက် (Drum beat) ပြောင်းသွားသည်။ 'ဆုံးဖြတ်ချက် တစ်ခုကျမယ့်' နှင့် 'ရှိသင့်တဲ့ အားနဲ့ မာန်' တို့သည် စကားလုံး အရေအတွက်ချင်း မတူကြပါ။ (တစ်ခုက ခုနှစ်လုံး၊ တစ်ခုက ခြောက် လုံး) သို့သော် အချက်ချင်း အတူတူ ဖြစ်သည်။ ခြောက်ခါ။


ထိုခြောက်ခါ၊ ခြောက်နေရာစလုံးမှာ ဒရမ်က ခြောက်ချက်တိုင်တိုင် ၀င်ပေးသည်။ ဂီတဗေဒ အရ ဒါကို ဘာခေါ်သလဲ ကျွန်တော်မသိပါ။ စကားလုံးတိုင်းမှာ ဒရမ်တစ်ချက်ဖြင့် ခြောက်လုံးခြောက် ခါ ခြောက်နေရာစလုံး 'ထပ်' ပေးလိုက်ခြင်းသည် သောတ အာရုံမှ သောကဒယကို နိုးနိုးကြား ကြား ဖြစ်အောင် လှုံ့  ဆော်ရာရောက်သည်။ 

ခံစားမှုအားဖြင့်ဆိုလျင် ကျန်ရစ်ခဲ့သော ကြိုးကြာတို့အတွက် ကြေကွဲမှုသည် လျော့ပါးသက်သာ သွားကာ တက်ကြွသော ဝေဒနာအဖြစ်သို့ ကူးပြောင်းသွားလေသည်။


Chorus အပိုဒ် အဆုံးတွင် 'ဟန်နိုင်မှ' သည် အင်အားကြီးသော အရှိန်တစ်ခုကို ထုတ်လွှင့်ပေး လိုက်သည်။ 'မှ' တွင် အသံ တက်ထားသည်။ ပြန်မချ။ Bb7 အသံ အတိုင်းထားသည်။ 

တစ်ချိန်လုံး ချိုမြအေးဆေးစွာ သီဆိုခဲ့သော ခင်မောင်တိုး သည်လည်း 'ဟန်နိုင်မှ' တွင်၊ အသံပေါက်ရော၊ လေပါ အားထည့် လိုက်သည်။


ဒီအချိန်မှာ ကြိုးကြာငှက်တို့ကလည်း ရိုးမ၏ အမြင့်ဆုံးကို ဖြတ်ကျော်နေကြပြီ။

                                              xxxx xxxx xxxx xxxx

'ရိုးမပေါ် ဖြတ်ကျော်လွှားချိန်
စီးလမ်းလေကြောင်းလွှာထဲ
ချဉ်းနင်း ၀င်ရောက်လာ ပြီးရင်
အားစိုက် မျှောလိုက်နဲ့
မိုင်ထောင်ချီ ပြန်(ပျံ)နေပြီ'


တတိယအပိုဒ် သည်လည်း ပထမ၊ ဒုတိယပိုဒ်များနှင့် သံစဉ်တူပင် ဖြစ်သည်။ သို့သော် အရသာ ချင်း မတူတော့ပါ။ စာသား အပြောင်းအလဲကြောင့် ဖြစ်မည်။ Chorus အပိုဒ် ခုခံပြီးတာကြောင့် လည်းဖြစ်မည်။


'ကြိုးကြာငှက် တို့ရဲ့ မိုင်ထောင်ချီ ခရီးစဉ်.........'

ဤ အချပိုဒ်ပြီးလျှင် 'ဆုံးဖြတ်ချက်တစ်ခုကျမယ့်' အဆိုပြန်ဝင်ပြီး အတီးပိုဒ်ဝင်သည်။ တီးပိုဒ်က အဆို စာသားပိုဒ် သံစဉ်အတိုင်း လိုက်လျောသော တီးပိုဒ် မဟုတ်ပါ။ တေးရေး ကိုမောင်မောင် အနေဖြင့် ဤနေရာမှာ တီးပိုဒ်ကို ဘယ်လို ရည်ရွယ်ချက်နှင့် ထည့်သလဲတော့ ကျွန်တော် မသိနိုင်ပါ။ သို့သော် ကျွန်တော့် အဖို့မူ အလွန်အဆင်ပြေသော တီးပိုဒ် နေရာချထားမှုဟု မြင်သည်။

'ရှိသင့်သော အားမာန်' တို့နှင့် ဟန်ချက်ညီအောင် ထိမ်းသိမ်းထားရင်း၊ ကြိုးကြာတို့ ဆက်ပျံ နေကြသည့် ခရီးကာလ အပိုင်းအခြားတစ်ခုကို တီးပိုဒ်က နိမိတ်ဆောင်ပြသည်ဟု ကျွန်တော် ခံစား ရသည်။


တီးပိုဒ်ပြီးတော့ တတိယပိုဒ် '  ရိုးမအပေါ် ဖြတ်ကျော်လွှားချိန်' ပြန်ဆိုသည်။ အဆိုထဲမှာ တယောသံ (?) က လူးလှိမ့်၍ ၀င်သည်။ ထို့နောက် ' ဆုံးဖြတ်ချက်တစ်ခု ကျမယ့်' ကိုးရပ်စ် ဆက်ဆို သည်။ 'ဟန်နိုင်မှ' စာသားကို အဆိုဖြင့် တင်ထားခဲ့သည်။ အီးဖလက်၊ စီမိုင်နာ၊ ဘီဖလက်၊ စီမိုင်နာ ကော့ဒ်များဖြင့် ဖွဲ့စည်းသော အတီးသံက တစ်စ တစ်စ မှိန်ပျောက်(Fade Out) ဖြင့် ဆုံးသွားသည်။


ကြိုးကြာ တို့ ရိုးမပေါ် ဖြတ်ကျော်သွားကြပြီ။ ဟိုး..... မိုးကုပ်စက်ဝိုင်း ဆီတွင် တစ်စ တစ်စ ဝေး သွားသော ကြိုးကြာတို့ကို ကျွန်တော် မျက်စိတစ်ဆုံး မြင်နေရသည်။ အဖြူရောင် ကောင်းကင် ကြီး တစ်ဖြည်းဖြည်း သေးငယ်သွားသည်။ သူတို့ ဆက်ပျံသွားကြပြီ။

                                          xxxx xxxx xxxx xxxx

ဆောင်းခိုငှက် တို့သည် မိုင် ၂၀၀၀ ထက် မနည်းသော ခရီးကို သမုဒ္ဒရာဖြတ်၍ ပျံသန်း ကြ ကြောင်း၊ လမ်းခရီးတစ်လျှောက် ရပ်နားစရာ ကျွန်းလုံးဝ မရှိသဖြင့် (ကုန်းမြေတောင်တန်းကို ဖြတ်သန်းရာမှာလည်း သစ်ပင်တောအုပ်များ၌ နားလေ့မရှိ) မရပ်မနား ပျံသန်းကြကြောင်း ဖတ်ဖူး၏။ 

အာတိတ် စင်ရော်ငှက်မျိုး ဆိုလျင် ဆောင်းရာသီ ရောက်လုနီးလာသည့်အခါ သူ၏ ပေါက်ဖွားရာ မြောက်ဝင်ရိုးစွန်းဒေသမှ မိုင်ပေါင်း တစ်သောင်းကျော် ဝေးသော တောင်ဘက် ၀င်ရိုးစွန်းဒေသ သို့ ခရီးထွက်ကာ ဆောင်းရာသီ ကုန်ဆုံးတော့မှ မြောက်ဝင်ရိုးစွန်းသို့ ပြန်သည်ဟု ဆိုသည်။


တေးရေး ကိုမောင်မောင်နှင့် သီဆိုသူ ကိုခင်မောင်တိုး တို့သည် ငှက်တို့၏ ဤသဘာဝမှ ကြိုးကြာငှက် ၏ ပျံသန်းခြင်းကို ယူကာ ရေးဖွဲ့သီဆို သွားကြသည်။ ကြိုးကြာသံ ဆိုလျှင် သာယာသော အသံဟု စွဲမှတ်ထားလေ့ရှိကြသည့် ကျွန်တော်တို့အတွက် ကိုမောင်မောင်နှင့် ကိုခင်မောင်တိုးတို့ ပေးပို့လိုက်သော ကြိုးကြာသံကား လှပနက်ရှိုင်းမှု အတိ ရှိနေတော့သည်။


တေးရေးတေးဆို အနုပညာသမားတို့၏ အာရုံကျက်စားမှုနှင့် တစ်ဆင့်ပြန်လည် တင်ပြပေးမှုကို ကျွန်တော် လေးစားစွာဖြင့် ကျေးဇူးတင်စကား ဆိုရပါသည်။ 'ကြိုးကြာသံ' သီချင်းသည် နှစ်ခါ သုံးခါ ကြားရုံမှုဖြင့် နားစွဲလွယ်၊ လိုက်ဆိုလွယ်သော သံစဉ်ဖွဲ့စည်းမှု ဖြစ်သည်။ 

ကိုးရပ်စ်ပိုဒ်နှင့်ပေါင်းပါမှ သံစဉ် နှစ်မျိုးပဲ ရှိသည်။ ဤသို့ ရှင်းလင်း လွယ်ကူခြင်းသည်ပင် ကြိုးကြာသံ ၏ လှပသော (ပြည့်စုံသော) အနုပညာ တန်ဆာဆင်မှု ဖြစ်လာသည်။ ရှင်းလင်း လွယ်ကူသော သံစဉ်နှင့် အတူ ရှင်းလင်း လွယ်ကူ သော စာသား (စကားလုံး) များဖြင့် ဖွဲ့စည်း ထားသည်။ 

ဤသည်ပင်လျှင် အကြောင်းအရာနှင့် အာဘော်တို့၏ ကြီးကျယ် လေးနက်မှုကို ကြီးစွာသော အထောက်အပံ့ ဖြစ်စေသည်ဟု ကျွန်တော် ထင်သည်။


ရိုးစင်း ရှင်းလင်းလွယ်ကူမှု၊ မလိုအပ်ပဲ တန်ဆာ ချဲ့ထွင် မွမ်းမံခြင်းမပြုမှုတို့ကို ရေးဖွဲ့သူရော၊ သီဆို သူပါ ကောင်းစွာ နားလည်ကြပါပေသည်။ ကိုခင်မောင်တိုး သည်လည်း ကြိုးကြာသံ သီချင်းတွင် သမားဂုဏ်ပြသည့် အရှိုက်အဟက် အတွဲ့အငင် များဖြင့် ဆော့ကစား မသွားပါ။ သူ၏ အေးဆေး ချိုမြသော အသံဖြင့် ရိုးရိုးလေး ဆိုသွားသည်။ ကြေကွဲပြခြင်း၊ ကြုံးဝါးပြခြင်း စသည်များမလုပ်။


ရေးဖွဲ့သူ၊ သီဆိုသူ၊ တီးခတ်သူ အားလုံးပင် သူတို့၏ ကြိုးကြာသံ ထဲက 'ရှိသင့်တဲ့ အားနဲ့မာန်-ဟန်နိုင်မှ' အပိုဒ်နှင့်လိုက်လျောညီညွတ် ကြပါပေသည် ဟု လေးစားစွာ ကျေးဇူးတင်စကား ဆိုလိုက် ရပေသည် ။







ရေးသူ- ချစ်ဦးညို
Crd ..  Aung Thike‎